مشاهد من ليلة الدخلة ( ممنوع الدخول لاقل من 18 سنة)

سيف الدولة · 01-05-2003, 05:18 AM

ليلة الدخلة 0 وش بسوي في ليلة الدخلة ؟ وكيف بتصرف ؟ وشلون بحتسي ؟ ووش بقول ان حتسيت ؟ وشلون بتصرف ؟
اسئلة كثيرة ومعقدة افنيت سنين من عمري افكر فيها وابحث وادور عن اجوبة لها وسألت اهل الخبرة بس لين اللحين ما عرفت شي خلوني اقولكم وش قصدي من القصة طبعاً العلم عند الله بس هذي بعض تخيلاتي وتصوراتي للي بيصير لي لليلة دخلتي ا: خبطت اقصد خطبت وبعدها تملكت حلو وجا يوم العرس وسبحت ( سباحة استثنائية باالعادة بس في الاعياد ) وفركت جسمي با الليفة وفرشت سنوني ونعمت وكديت قذلتي وحددت شنبي وقصصت اظافري ( علشان ما امخش ) ولبست صراويلي وفنيلتي وبعدها طقيت لك ثوب العرس الكشخة ولا ارضا بأقل من ثوب الدفة طبعاً عريس وبعدها صكيت القلابي وبيحمر وجهي كاالعادة ولبست الطاقية الزري ( وععع) وفوقها شماغ العقل ابو خمسطعش وفوقة عقال متنتف وأخيراً لبست آخر قطعة وهي البشت واكيد بكون متسلفة من واحد من الربع اما بفصل واحد بهاك العدة علشان ليلة معصي0 وبتجي الوالدة الله يطول لي بعمرها ( قولو آمين ) وتبخرني وتصبصب علي من انواع الاطياب وبتقول " ما شاء الله عليك حارسً يحرسك يا وليدي كلك ملح وقملة اقصد قبلة وبتجي جدتي سوير وبعد ما تبسي ( الفلم الهندي زي العادة ) بتقول هي بعد" ولااااااااك يخزي العين شو ما احلااااااااك يا بيزاا ( حشى وراها قلبت بنانية ؟) لا بتقول " مبروك يا عميري والله عشت وشفتك معرس عقبال ما اشوف عيالك معرسين ) وطبعاً بيخلل كلماتها هذي دموع ومشاهق ووقفات لمسح الدموع با الشيلة ثم المتابعة وبينقصنا صوت ربابة علشان يكمل المسلسل يعني شغلة تبخرت وركبت في سيارة اخوي ( كراسيدا 95 جي ال) اكشخ موتر عندنا طبعاً بركب ورا وابوي بيركب قدام ولو ابو العريس وادهرت الصوالين تحمل باقي الحريم وما يحتاج طبعا صياح البزارين ولجتهم هذا بيركب قدام وهذا يبي يجلس عند الدريشة وذوليك قالبين المرتبة الاخيرة فرع لملاهي الحكير وانواع الصياح وذيك تجلد في البزر علشان يوقف عن الصياح ( هذي اللي لين اللحين ما فهمتها عجبي ) ! سرت القافلة او الموكب وبدو طبعا دحيم وعبيسة يظربون بواري بسياراتهم ( ددسن 85 وهايلوكس 88) وعلى بالهم يسون لي زفة وفضحونا بسياراتهم ( من زين السيارة اللي عاد انا راكبً فيها ) والقراوى دحيم وعبيسة يحسبون لا صرت في موكب عرس يحقلك تقطع الاشارات وتعاكس في الشوارع وتسب وتلعن في اللي ما يفتح لك الخط 0 انا اصلاً من شفت ضرسة اللي في الواجهة طايح ويقولي توة لبان وانا غاسلً رجلي منة وصلنا للقصر واكيد انة بيكون في حي النسيم لاني طفران وماني قد قصور الافراح اللي باالعليا بيعرض اخوي بسيارتة عند المدخل وبيجون يركظون اخوان العروس يفتحون لي الباب ( هين كلها شهرين ويتوطون في بطني ) 0 بنزل وبسمع الخنبقة المعهودة " مبروك مبروك منك المال ومنها العيال " بيجي ابو العروس يسلم على ابوي ثم علي وبيجيون اثنين شايلين مداخن البخور وبيغمتوني بريحتهن واكيد طرف شماغي بيغط داخل الدخنة وبيحترق زي العادة0 مع ها الاجواء الحلوة والريحة الزينة بيهجمون علي الناس ويحبحبوني وبلقى انواع السعابيل على خدودي عقبهم وعقال بيطيح اكثر من مرة وطرف بشتي بيوطونة لين يقلب لونة وكل هذا عادي ومستعد لة0 عقبها بيمسكني ابو العروس مع يدي تقل اني اعمى ماشوف دربي وبياخذني الى الصالة وبيجلسني على البيست ( طلع ديسكو مهوب قصر افراح) بيدهرون المبزرة باالقهوة والواحد منهم لاجا بيصب لي الفنجال بيقعد ينتفض ويرجف من الرهبة ولو هو جالس يصب للعريس ! بيغثوني قهوة وشاهي ومتأكد انة بينكب فنجال قهوة على ثوبي من واحد من ها المبزرة

لا يمكنكم مشاهده باقي المشاركة لأنك زائر ...
فإذا كنت مشترك مسبقا معنا فقم بتسجيل دخول بعضويتك للمتابعة وإذا لم تكن فيمكنك تسجيل عضوية جديدة مجانا ً ( من هنا )

jroo7 · 01-05-2003, 10:44 PM

موضوع مهم وصريح جدا

مشكور على المجهود

وانشاءالله الكل يستفيد من الموضوع

وننتظر منك المزيد

Love · 01-05-2003, 10:51 PM

تسلم اخوى سيف على الموضوع المهم
ويستحق النقاش فيه
وبالفعل مثل المواضيع هذى الواحد يستفيد منها
وانشالله الجميع يتسفيد

سيف الدولة · 02-05-2003, 02:31 AM

السلام عليكم ورحمة الله وبركاته
fares1a

احب اقول و بدون مجامله ما شاء الله على الموقع يستاهل و الله و هذي خدمه حلوه مره ملفته للنضر مشكورين على هالموقع وما قصرتم ولا ودي اطول عليكم في الكلام .

حمد بن دريب · 02-05-2003, 04:01 AM

سيف الدوله

والله العظيم اني اقراء الموضوع وانا فاطس من الضحك

حسبي الله على عدوك

عز الله انك جبت العلوم كلها

لاهنت يالغالي

تحياتي
اخوك حمد بن دريب

المخيال · 02-05-2003, 11:13 PM

الاخ / سيف الدوله موضوعك حلو حيل ومفيد وفكاهي اكثر ومشوق جدا :D

وشكرا لك علي هذا الموضوع

سيف الدولة · 03-05-2003, 12:17 AM

الأخوان المكرمين حمد بن دريب & المخيالfares7

حياكم و أنشاء الله تكونون
بخير وفي أحسن حال

أتمنى ما تتمنون أو ما ترون ...
وفي أغلب الحالات وليس أقلها..
أشكركم على الزيارة
ولكم تحياتي

سيف الدولة

سيف الدولة · 07-05-2003, 05:35 PM

سلام شلة باالله قبل اي شي لا تفوتكم القلوب اللي مختارها فوق راسي ذي وش رايكم ؟ ابوك ياراعي الرمنسية في زمن الانمبرانيريرة لا يسأل وش معناها رجاءُ كلنا شباب وفاهمين بعض خلوني اكشخ شوي واسوي نفسي مثقف. تكملة الحلقة الثانية من ليلة الدخلة يا كريم ارزقني بوحدة تشبة سعاد حسني يوم انها ام 19 وعليها خفة دم عادل امام و خبال سعاد يونس وزوائد ليلي علوي وصوت اصالة نصري ورقة آثار الحكيم ادري بتقولون وعععع قديييم بس سشوي هذولي آخر علمي با التلفزيون .

وصلنا لعند يوم سندريلا ضاعت نعلتها ورنت الساعة ثنعش باالليل اووووة اسف اسف شبكت الخطوط قصدي يوم اني ابي المح للمدام انة خلاص ياالله نبي نرقد ونلعب عريس وعروس بعد ما تخرعت واستحت وقالت : تونا على النوم هذانا نسولف ! اية هين جاك الموت يا تارك الصلاة قلت وش نسولف فية ؟ وليش من الاساس نسولف ؟ انا ما تزوجت علشان اسولف ! مليت سواليف مليت ابي شي غير السواليف هي ما عجبها كلامي وحست اني ذئب بشري متزوج بس علشان السيكوسيكو مو علشان بناء عائلة يجمعها الحب والصدق ومجموعة لا بأس بها من البزران اللي بيخربون علينا بعدين الهدوء والصفا اللي كنا نعيش فية وما اقول الا الله يعينهم على دوا الكحة اللي بحقنهم منة ليل ونهار وزعلت وخندرت طبعاُ بقولها خلاص ولا يهمس نسولف نسولف وش ورانا وعننا ابد ما نمنا ارتحتي خلاص بشري امس طيب خخخخخ؟ اكيد بتنفتح خشتها من الفرح وبنبدا السواليف البايخة وهي " انا ما احب اكل مكرونة انا ما احب اشرب شاهي بنعناع انا انسانة جدا حساسة ادري نصابة والايام بتثبت انا جداً غيورة ولازم تستحمل غيرتي عليك ان تسان ها الجدار يحس فأنتي مثل انا ما احب طلعت الاسواق وروحات العروس والخربطة هذي هين وقتس برا البيت اكثر من داخلة انا أقدر الحياة الزوجية واهم شي انك تفهمني وافهمك اثار المسلسلات المصرية واوعدك لا سمح الله وصارت بينا مشكلة ماراح اقول لاي احد عنها وبنحلها سوى غير اهلها قل بنات الجامعة وبنات خالاتها واحتمال الشغالة يجيها علم باالمشكلة) وصدقني اهم اهم شي عندي هو انت الان انت تسوى عندي دنيتي واهلي وكل شي عندي لانك زوجي اللي بتلعبين بحسبتة لعب يا انا مسكين بس واسمع انا ما يهمني اذا كانت لك علاقات غرامية قبلي المهم اللحين ما يكون فية شي يا حسرة شيفة محدن يبيني حتى اهلي ارسلوني لامريكا مهوب علشان اتعلم الا علشان يفتكون من كشرتي اللي تجيب الهم. وبتقول انا انسانة محبوبة من قبل اهلي وصديقاتي لطيبتي وهي الكل يبي فرقاها وانا اعرف اصلح كل شي في البيت من الطبخ الى التنظيف واي شي يخطر ببالك اعرف اصلحة من الاكلات عز الله يامال الشام بيبحون من وراي من اول لحالي اللحين زادت هي وخشتها قالت طبخ قالت قصدها بيض محترق واكثر شي ما ادانية الكراث ما احبة ابد اقول الله يعين على المشاوير لسوق عتيقة وشرا من ها الكراث لزوجنا المصون مالت بس وبدوري بخنبق بعد وش زودي الدعوى كلة نصب بنصب وبقول : انامتعود آكل كورن فليكس على الصبح او خبز تست مدهون بزبدة يحلفون بغير الفول ما تعترف وكاس عصير برتقال علشان خلاص بشرتي تعودت علية اية هين بغير كاسة شاهي وزيقارة والله ما تفك معك و انا ماني راعي سهر وصياعة( بس حدي 4 الفجر انا مالي شلل واجد وربعي محدودين بس نص شباب الرياض اللي اعرف) احترم المرأة وحقوقها انواع الجحيد بتشوفين بس اصبري سنة وحدة حتى مفاتيح البيت منيب معطيس اياهن انا ما عمري غازلت اي بنت ولا عمري كلمت بنت باالتلفون نقول 15 بنت كفاية انا مثلس اقدر الحياة الزوجية واتمنى انس تفهميني زين الاخ مادة انا انسان رياضي جداً واحافظ على تناسق جسمي دائماً كلها ستت اشهر والكرشة حدث ولا حرج تقل كيس شعير ومن العجز شعر الاباط واصلن الركبة وععععععع) طيب اللحين خلصنا تفاهم ونصب على بعض وش نسوي ؟ طيب بنلعب كيرم شوي قديم ادري وبعدها بلاي ستيشن واخليها تفوز علي خبيث مغزاك واضح ! وبعد اللعب عاد بيجي وقت الجد بقرب لمها وبقرب زود وزدود وبتفاجأ بانها تبعد عني اول شي بقول يمكن ريحتي شينة ! وبعدين بقول لا هذا حيا ودلع بنات ! وبتروح هاك الليلة وحنا ندور على بعض انا اقرب وهي تبعد وبكون شايل عطر معي وابخ نفسي كل شوي علشان ريحتي تكون حلوة دوم راحت اول ليلة وانا كأني ما تزوجت بحس باالفشل بحس بإنكسار في رجولتي وبفكر وش لون بقابل دحيم وعبيسة خصوص اني واعدهم اقول لهم وش سويت اول ليلة في عرسي مع وصف كامل لكل الاحداث اللي جرت ولو شباب ونفزع لبعض يعني دروس مجانية لهم جا الصبح وبكون نايم على الكنبة وهي منخبقة على السرير جعلها ما تقوم من علية الا بنقالة لحالها بعد ما قفلت باب الغرفة عني بزعمها حيا ودلع وما اقول الا مالت بس طق طق طيق الباب يطق ! ياربي من ذا اللزقة اللي جاي ها الحزة ؟ بفتح الباب وبكون لين لللحين مشخص باالبشت وما فصختة ولو انة بيكون متعفط وحالتة حالة ما جتني فرصة اني افصخة والا كان علوم بفتح الباب و بشوف كيس شعير قدامي ؟ يا ربي منهو ذا السنافي اللي حط هديتة لي بمناسبة عرسي وراح ؟ وبعدين بقوم من تخيلاتي على صوت قادم من اعلى كيس الشعير وبيكون خالي ابو المدام وما كيس الشعير الا كرشتة ومعة حماتي والله النشبة بعد بيقول مبروك وصباحية مبروكة يا عريس اي عريس الا صايراً معلق لا تسذا ولا تسذا بتدخل الدبى حماتي وهي مدنقة وكنها تقول الا غصبن عليك تحب راسي ياالله حبة يا مال العمى وبتكون شايلة قدور وحوافظ اكل يمممم) بيدخلون للصالة وبتروح حماتي للمطبخ تمون وادري بتقعد تحربش وتتلقف وتشوف حنا تعشينا امس والا لا ؟ ووش تعشينا ؟ تخبرون لقافة حريم في اللحظة هذي بتقوم سندريلا زمانها على غفلة وبتطلع من غرفتها مشخصة وبتسلم على ابوها وامها وخطر ما تتكسر من النعومة مع انها اجلف من الجلف بس كذا تخبرون حركات البنات واللي ما يعرف ذا الحركات الله يعينة بس خبرة وبتمسكها امها في المطبخ ! وخذ يا تحقيق " وش قال لس ؟ ووش قلتي لة ؟ لا يكون انة ما عجبس ؟ ترا نغيرة يا بنيتي وين تغيرينة انتم شارين رجال والا ترمس شاهي يومكم تغيرونة وطيب يا بنيتي وش صار البارح ؟" البنت بتميلح عند امها وبتقول لا يمة الولد طيب وحبوب وشكلة عاقل والله للاسف ما ظنيت بي ذرت عقل " عاد الفضيحة امها بتدري اننا ما سوينا شي ليلة امس ! بتجي وتقعد تناظرني وكني مو مالي عينها اكيد بتقول ذا مهوب رجال تكانة والا انة الله يستر من قوم مجدي وكل هذا وانا ببشتي خخخخخ مو مشكلة بستحمل نظراتها الاستحقارية لي وبتجي المدام مصلحة القهوة وبتصبها وادري والله ادري بتصب لابوها فنجال قبلي( آااااخ يا القهر هذا وانا في بيتي بعد) وبعد شوي بيحتسي ابوها " هاااه وين عزمتو تسافرون لة للشهر العسل ؟" نسافر ؟؟ بقول في نفسي تكفى يااللي مقطع انت وعيالك شوارع لندن وفرنسا ؟ اي سفر الشرقية وتخب على بنتك بعد قال سفر قال وبقولة والله ناويين الشرقية المصياف الاول والاوحد للقراوة اذا تزوجو وانشاالله بنمشي اليوم على اخر العصر . بيقول ايية تراها زينة اللحين وبراد وشف ترا احسن من فندق الشيرتون منتب لاقي حنا دايم نسكن فية اذا رحنا هناك . اخس منتب عاقل انت وعيالك ؟ حدكم خيمة فوق شبك الصالون وتنامون فيها على الخط السريع انت وين والشيرتون وين انت لو تسكن في الشيرتون كان خلاص معها تكون حققت كل طموحك في الحياة واكيد اكيد بتاكل الصابون الصغير اللي في الحمام على انة حلاو يا القروي . بعد شوي بيقومون وبتقول امها ياالله نخليكم تفطرون على راحتكم والله الله ببنيتي عاد عودنا من جديد امس قايلتها لي حلا هو والبنت عاد بتشقق مرررة امها وتوصي عليها صحيح القرد في عين امة غزال وما اقول الا حلالات من حطس انتي وامس بعراوي في الصندوق ومشا بكم ميتين في شارعُ كلة مطبات خخخخخخ --------> يتبع

سيف الدولة · 07-05-2003, 05:42 PM

دام تكملة مشوار ليلة الدخلة طويل حبتين صارت لها كمالة أخيرة ويارب تحملوني

مجرم حرب بيضفون وجيهم عننا عاد اكيد اول صبح لنا بتشوف انواع الابتسامات والضحك وكل واحد مننا يبي يعلم الثاني اني دايم كذا لا صحيت من النوم اضحك كلها شهرين وتشوف الفضايح عاد بتبدا فضايحي انا اول طبعاً واولها الغمص الى جانب سعابيلي اللي تخرخر وانا نايم وبتلقى الكنبة مليانة سعابيل عقبي وبتبدا اثار خرمة الدخان عاد وشلون اصرفها اللحين ؟ تبي تتفلسف علي ادري وبتقول شرايك تاخذلك دش خفيف على مال اجهز الفطور ؟ وباالمرة تغير ملابسك ! تدق علي دش خفيف ؟؟ يا حسرة وليش بس بروح ادربي راسي للحمام وبسبح وبدخن فية عند مروحة الشفط ذكريات المتوسطة وبطلع واسفسف شعري وابخبخ من الطيب لين ادوخ من ريحتة .لاني ببخ شوي في اثمي علشان تروح ريحة التتن ذكي صح خخخخخخ). مو مشكلة افطرنا وروقنا وباقي على صلاة الظهر ثلاث ساعات كافية والله كافية نجيب فيها درزن بزارين مهوب واحد بس منا منا ما عندك احد بتتعذر بتزبيط الشنطة للسفر طبعا شهر العسل طبعاُ بكون متعذر من اي عزيمة على الغدا وبروح اجيب لها غدا . هااااه وش نفسس فية يا حياتي وش تبين تتغدين ؟ في نفسي بقول اللحين بتطلب مشويات او شي متطور شوي وبنصدم بطلبها اللي بيكون الله لا يهينك نفسي والله بكبسة بخاري مع لبن ؟؟؟ وين وين يا هوووة انا متزوج بنت ناعمة رقيقة والا متزوج ابوعرب على غفلة كبسة بخاري ولبن ؟؟ الشكوى لله جبت اللي تبي ودبغنا في الرز لين دخنا وعالجناها بكاس لبن خلانا نفقد الذاكرة لمدة ساعتين وما صحينا الا على اذان المغرب . جا المغرب وحنا في السيارة متوجهين للشرقية كذا القراوى وخذ يا تقشيم فصفص وشاهي وسواليف ونضحك على بالنا هذي هي الحياة الزوجية اللي يقولون عنها والمشاركة الزوجية هي اني امد لها بيالة الشاهي وهي تندق للزمزمية وتصب لي وانا من اللعانة اذا دنقت علشان تصب الشاهي بمسكفرامل بقوة علشان راسها يصقع في الطبلون خخخخ) وحنا باالطريق اقردن فيها يا بنت الحلال افتشي خليني اشوف وجهس اذا حتسيتي ترا ما فية الا انا وانتي باالطريق والدنيا ظلام ؟ وهي بتقول " هوووو ما بقى الا هي بعد افتش في الطريق لا والله ما علي عازة !! وصلنا باالسلامة وحطينا الشنط والعفش والا الساعة حول عشر باالليل على طووووول للكورنيش قايل لكم والله قراوى حط البساط والمركى ونقعد نطالع في البحر شواطيء فلوريدا على غفلة) ! ونطالع في البحر ! وكل واحد مننا بيسوي نفسة رومنسي عند الثاني طبعا ! هي بتقعد تتامل في البحر وتسبر عيونها على الاخر يعنني حالمة ورومنسية وكل شوي على بالها بتتنهد بشويش يلعن ام الاغراء يا شيخ وما اقول الا مالت على وجهس! محاكيكم بيقول مافية احد احسن من احد بفصخ شماغي وبطلع شعري الحرير الاسود وبنسدح على المركى وبقعد اتنهد كل شوي ولو ان تنهيدي بيكون ممزوج بخشرجة بسبة التتن لكن يعنني امواج البحر اثارت عواطفي وانواع التنهد وبعد ساعة بتلتفت هي علي وبتقول " ياالله شكل البحر في الليل يجنن " جابت شي جديد هي وخشتها اعمى انا يعني ما اشوف) برد ايييييية صدقتي انا دايم اول اذا ضاق صدري في الرياض اجي للشرقية علشان اوسع صدري على البحر بس قصدي البحر من الجهة الثانية من عند ديرة البحرين لان الكورنيش حقهم فسقان والا الشرقية ما اعرف فيها الا الجسر وبس بس ماودس نروح للفندق احسن تراني تعبان من المشوار نصااااااااب ومكشوف بتقول ياالله نروح ولاحقين على البحر حنا بس قمنا وكل شي قم الشجر قام والبحر قام وباقي الناس قامت معنا في الفندق وبعد ما وصلنا لبست احلى ماعندي نعم نعم انة هو ذاك البنطال البردقاني الذي يمنحني رجولة فوق رجولتي وحيوية وفحولة والاخير مطلب اساسي في تلك اللحظة الحاسمة كيف لا وانا على مشارف فتحً ونصرً كبير ! هي دخلت الحمام وطولت وطولت وطولت ؟ وش السالفة ! اخيييييرً طلعت قبل ما تطلع روحي وقلت اكيد بتلبس لي ذاك اللبس اللي يخليني اقول ميووووووو من زود ماراح يجنني ! بكون ملطع في غرفة التلفزيزن احتريها تجي وانا اقول الله يستر على عقلي لا يطير اللحين لاني متوقع اشوف شي عمري ما شفتة ابد ابد ومغير اسمع عنة من الشياب عيني في خشمك بليييز بس المصيبة والطامة بتكون انها لابسة نفنوف ابو كموم طوال وواصلً الى رجليها ودلعتة خانقة رقبتها والديرمان في خشتها وفارقة شعرها مثل العجز الاولين ويوم مشت طلع بنطرون قلت بس هذا اكييييد الستليتش وباالتالي طلع بنطرون بجامة وشكلة من مخازن الحرس الوطني لان لونة بوني انا نصدم وبيتعفط وجهي وبندب حظي اللي بلاني فيها ياربي وش ذا الحالة ؟ هذا هو العرس اللي صاجينا بة ؟ هذولا هم البنات اللي تطورو ويعرفون يكشخون ؟ وش السالفة ؟ هذي بنت عمرها 2 والا عجوز من عجز مشيقر ؟؟؟ بتحوم تسبدي منها ومن خلاقينها وبحط راسي وبرقد اففففففف وبتجي تتميلح هي ويا الحنا اللي في يديها وبتقول " هووو تبي ترقد يا فلان " حتى مهيب قايلة يا حبيبي بلقيها ظهري وبقول " والله اشوف ان النوم اصرف من مقابل التلفزيون " -------> اذب على بعيد عاد هي بتحس والا بتدري عن مقصدي ! الله يخلف بس بتقول اييية والله انت تعبت من السواقة في الطريق ارقد وارتح وانا بروح اهذي شوي بصل وطماط للغدا باتسر ؟؟؟؟ امحق عرس بحاول ارقد مااااش مانيب قادر فيني حاقص وواقص من وين طلعت ذي ؟) بس اذا تذكرت صروال بجامتها حامت تسبدي وعععععععععع بتروح ذيك الليلة بعد وانا مكانك سر لا جديد ولا شي يدل ويثبت زواجي ! وبترقد اكيد في المطبخ تقل شغالة الله يخلف وكلة على بالها انها من صغرة وهي طباخة وتموت في شي اسمة مطبخ !! من بكرة نفسي بتكون في اصبعي الاوسط اللي في رجلي اليسرا من الهم مهوب في خشمي ! بتجي تقومني وخطر لا ارفسها من كثر ما هي لوعتني بخلاقينها ! لا عااااااااد الصبح على بال امها تبي تكشخ تكشخ قدامي تبي تطلع الخلاقين اللي شرتهن من فلوسي مهري يا عالم وتلقاها متقضية من سوق الحلة والا الديرة بتلبس تي شيرت ابيض مرسوم علية ميكي ماوس وتنورة سودا تكنس الارض من طولها اوففففففف والله البلشة نعم وش تبين ؟ هووووو قم يا فلان الساعة اللحين 1 الظهر قم افطر وخلنا نروح للبحر . ياذا البحر اللي صجيتينا فية لعنبو بليسسس لوس اجل رايحة لشواطي فلوريدا وش بتسويين ؟ بترقدين على الشاطي !! قمت وافطرت ولا جديد هي هي نواشف طلعنا للبحر واخذت صروال السبحة ناوي اسبح وابعد عنها ويوم شافتني البس الصروال عند البحر صاحت وقالت " هوووو وش تسوي ؟" قلت ابد والله اوقع شوية معاملات !! يعني وش اسوي البس صروال السباحة بسبح يعني بطب في البحر مانيب رايح ازور احد والا شي من هذا القبيل !! لالالا والله ما تسبح وفية بنات يشوفونك ؟؟ اي بنات يا بنت الحلال وينهم البنات ؟ الا شفهم العايلة اللي جنبنا معهم بنات وانا ما بيهن يشوفونك وانت مفصخ وتسبح انا اغار والله . بطب فيها وبقول الللحين تغارين علي منهن لا يشوفوني مفصخ وانتي يا حسرة ما بعد شفتيني ؟؟؟ وش ذا اقول ترا نفسي في خشمي اعقلي بس خربت الاخلاق. بحس اني غلطت عليها وبنثبر واجلس وما نيب سابح بتقعد عاد تسولف علي والله من زين السواليف بتقص لي حياتها في الطفولة والله من زين الطفولة ويوم انهم كانو يروحون لمزرعتهم مزرعة الخالدية على غفلة كلها مية متر وبربري ونخلة ما تلقح وبركة موية مغربة وخيمة وانها كانت تلعب مع بنات خالاتها ويلعبون حريم وبعدين يروحون للبركة المسبح حق القراوا) ويلبسون لبس السباحة وهو عبارة عن شلحة ويرشمون على بعض وانها مرة بغت تغرق في البركة وفي نفسي بقول يا ليتس غرقتي وارتحت منس وبعدين في الليل يجتمعون الحريم مع بعض ويرقصون على صوت القدور وانها احسن وحدة ترقص واحسن وحدة تطق على القدر زار الله من زين الهوايات متزوج طقاقة وانها انخطبت اكثر من مرة بس هي ترفض وبتقول ما ادري ليش كنت ارفض مع انة تقدم لي دكتور ومهندس وواحد كان مرشح للوزارة وانا داري ان محد طق بابهم من الاساس وان حصل فهو سباك والا بنشري. وانا بخليها تبربر على راحتها وبعد ما تخلص بقوم وبقول لها بروح شوي لدورة المياة واجي وانا بروح اتتن وبجي وريحة التتن تفاوح وبتشم الريحة وبتصارخ " تتن الا انت تتن يا خاين يا غشاش كذبت علي ليش ليش " بناظرها ببرود لان خلاص نفسي طابت منها وابي اي شي بس يشب الهوشة بيننا لعل وعسى تطلب الطلاق من نفسها وبقول لها اية اتتن وش عندس عاد ؟ حر وبكيفي ادخن اشيش وترا الدخان يباع في البقالات عادي واذا مو عاجبس خلاص روحي بطريق وانا بطريق والله يستر على الجميع !!!!!! هي سمعت كلامي وهي اللي تتغير مية وثمانين وصارت تضحك اللحين وقالت " لا شدعوة صدقت انت حر وسو اللي تبي والدخان اصلاُ صار عادي مهوب بيق مستيك "!!! اخسي تتكلم لغات البنت مهيب عاقلها خخخخخ . وعقبها البنت عقلت وصارت تسوي اي شي ابية حتى السيكو سيكو ابشركم حصل وه على العموم جلسنا في الشرقية اسبوع بس هي اول يومين طلعنا للبحر وباقي الاسبوع قضيناها في الفندق ما طلعت منة ابد خخخخخخ والمدام اللحين ابشركم حامل بدستة الله يصلحهم امين ولكن نعم ولكن زوجتي ما زالت قروية ما تعرف تلبس ريحتها شينة كلامها قروي من الطراز الاول دفشة وعربجية حتى فى المزح واخر مرة مزحت معي دخلت بسبتها المستشفى لانها حطت لي سم في الاكل على بالها تمزح الشينة هي صحيح طيبة وحبوبة وقايمة باالبيت على اكمل وجة وتبيض وجهي اذا عزمت احد ولكن : مهوب هذا اللي انا ابي وبس !!!!! ابي اشوف كل مرة ادخل فيها بيتي فتاة جديدة !!!! ابي اشوف انواع الاغراء حر زوجتي مهوب الدعوى خذني جيتك وبس !! ابي انواع الملابس الحلوة والعطورات اذا قلت لها ياالله بوديس للعقارية علشان تشترين ملابس وعطورات قالت لا والله مانيب رايحة الا للمعيقلية يقولون عندهم تنزيلات !!!!) انا اريد باختصار " ريانة العود " لمن يخبر لي ريانة العود يرسل لي على الايميل رجاءُ . الله يعين على الهواش يقول صنيتان ابن ديفد الاندلسي : خذ وخل من خنبقة بيزاا

ودامت لياليكم سعيدة

ونسلم عليكم

jroo7 · 11-05-2003, 11:05 AM

بعد فيها جزء ثاني توقعت جزء واحد:D:D:D

يعطيك العافية والله ومواضيييييييييييييع تستحق المتابعة ;)

وننتظر مواضيع جديدة منك